صابر وطاوي المرض في كنينه

صابر وطاوي المرض في كنينه

صابر وطاوي المرض في كنينه
فاقـد قـرينه
الخاطر امعا الياس باقي جرينه
صابر وطـــاوي المرض نين هـاسـه
ملعــون ساسه
ســـم اللفاعـــي مــا ْيريد ْسيـاســه
واللـي نطــق بالحــق غـــابوا ناسه
اتجيــه الغبينه
اعْلـيّ ظـلمها دقــداق مـنْا.. فيـنا
تكسير عـظـم وفي نهــار مْحاسّــه
ويا(عاشور) ابقينا
تبات جمـر تصبح في ْمراح عوينه !!
صابر وطـــاوي المرض وين بات
وسيّبْ بنات
اطفــال نشـو فــي عمــر النبــات
اللي كيـف لبس الزهور الخايلات
ولو كان فينا
احسـاس ورجوله بالصحيح بكينا !!
منحاش المبادي سوق خوذ وهات
والبعض دينه
حساب المصالح كــان تنشد وينه ؟!
صابر وطـــاوي المرض في التْعبيّ
المشكى ْلربي
عـــلاْم الخفايـــــا مـــا عليــه تْغبيّ
يموت طرحهم لو كــان كـوز ْبكبْيّ
بخبطة ايدينا
امغير ننغروا يـاك الزمــان ايجينا
وكيف مافــزع في تشاد لخونا دْبيّ
ومن غير ميناء
مــوج ْيتـلاطــم.. طــْق لنجـامينا !!
صابر وطـــاوي المرض ما يْطوّل
صيــوره امحوْلّ
ربـــك كــريــم ومــاعليـــه ْتقــوْلّ
فــرعــــون قبله فــي زمانه لـوْلّ
وطغوة جبينه
تـرمـي ولـــدها كبـــدها الجنينــه
تنــزيل ســره.. من ْيريــد يــأول
ويقرا علينا
آيات عبره.. نين يــوصـل سيناء !!
صابر وطـــاوي المرض يا(عاشور)
من ظلم جور
واحكــام عســف قــوّالـة الـــزور
بنْايّــة ْحبوس ويجهروا في ْقبــور
غراقة السفينه
خلــــوا بـدنهــا للقهـــاير عــينـه
ومـا توجعـــك نبحة كــلاب ْتــدور
خرّابـة المديـنه
قريـب ايـجي خـلاّص يوفْـــيّ ديـنه!!