لا تحزن يا مظلوم

لا تحزن يا مظلوم
ان ما خذت حقك من اعداك اليوم
بكرة تاخذه
ريّح بالك
واشكي امواجعك للّي عليه اتكالك
اللي فالحجر للدود دار مسالك
وحاصي اعداد الحوت في الديموم
ويبصر النملة في الظلام الحالك
وهي لونها كيف الغراب عتوم
افداك ما حصلّك من صغا وجرالك
الصابر ثوابه ياخذه متموم
ملحوق بتت من صاحب عدو تمَّالك
وفيَّ عهد تحسابه وهو مبروم
بلا طيب خاطر عزقتك لجلالك
خلاك بصر كسَّار القرون تروم

لا تحزن من ظالم امقطمر حالك
ولا يوجعك حقك اللي مهضوم
حتى لو يضيع اليوم بكره سالك
منين من بعضهم يخلصوا لخصوم
عليش يا لهالك تشتكي من هالك
من غير ربنا ما حد يريد يدوم
بالله وين كسرى اللي عظيم ممالك
وهرقل لمنقمر عظيم الروم
وما من ادول في دار هالمهالك
فنن لا قعد حاكم ولا محكوم
هذين المقابر شاهدات اقبالك
ما من امعرك تحتهن مردوم

هدي روعك
ولا تحزن م اللّي خربوا مشروعك
كيف الغريب بقيت بين ربوعك
ما تقول عندك في البلاد ادموم
لا تخاف ما يمشن بلاش دموعك
على الله يبقوا من دعاك ظلوم
عليش للعرب تشكي وناصب نوعك
تكفيك قولتك يا حي ياقيوم
ايخلي جميع الصاعبة في طوعك
وسيع فضل ويفرج على المضيوم
وتزهى بعد تلكايتك وخضوعك
ترونق وشملك تنظره ملموم
اينور بعد طولة ظلام شموعك
اللي عليم بالظاهر وبالمكتوم

لا يشفقك تخويف
ولايرهبك تهديد وتبقريف
حتى وانت ظرفك يا قرين عنيف
يزوم كيف ما شيخ الرعود يزوم
المسلم يشوب م الشدايد كيف
المهم دينه ما لاعداء معصوم
ان عاش منهجة واضح شريف عفيف
وما ادعدعه محنة شديد عزوم
ولا يلحقه ع الفانية تحسيف
ان مات ع الهدى في لاخرة مرحوم
الدنيا مظاهر كي الوان الطيف
ما عمرهن في سوق جابن سوم
ولا في القوي ترحم ولا الضعيف
اللي ما اقتل من سيفها مكلوم
تعريف ما مثيله ع الفنا تعريف
الواعظ الصامت من بلاد سدوم

بث اقهارك
لربك اللي عالم خفي اسرارك
برادته يزولن محنتك واكدارك
زوال مزن صيف يسوق فيه نسوم
وتنسى جميع مواجعك واضرارك
وتروق نين تحلف ما نظرت هموم
ان هانك اللي صاحب قديم وجارك
ما عد ع للي يجهلوك تلوم
بحّره وشره وانت غافل زارك
وعندك وعنده مقصدي مفهوم
سحب بساط راحاتك وهد عمارك
وخلى سماك املبدة بغيوم
لفالك اللي ما كان في اعتبارك
امرار هول تقنيدت اركب واسهوم
خلاتك اتحسب سامرات انظارك
تقطيعة خيوط سداك ما القاروم
يبين الله ادعاك وان اسحارك
فيه نين من همه يعاف النوم
ويندم علي تحويسته لمدارك
ويرضع بعد طيب الدرار سموم
بما يجود به شعري معاك نشارك
ونا كل مسلم ننصره ملزوم
نين م الخصيم يبات حقه دارك
ويبات النزاع لصالحه محسوم
وان كانهو ظلم ماني سريبه تارك
نديرله مقادع يلزمن وتخوم
ولاني اللي ظلمه نريد نبارك
ونفخر بنعرة عمرو بن كلثوم

ما يحزنك تلبيسه
ابليس اللعين هذاك وتوسويسه
ان جاه يندفع وتصير له تخنيسة
مع الذكر جملة مابنا امهدوم
اوراه م البشر عنده اصناف نجيسة
عليه في الشطانة واخذين علوم
الواحد اثياب امغطيات دسيسة
ما تغربك ضحكة وزوق اهدوم
تقول صاحبي ويحق فيك فريسة
ان صاد غفلتك عنا ايشن هجوم
ولا يعرف اموازه في تدعيسه
ان غار لا يهلّب غفل لا ميسوم
ويخنق وما في خنقته تنفيسة
من خوف للنجاة يديرلك سلوم
اليوم حيل صحبة هالزمان خسيسة
عقاب عزها هانه وكسر خشوم
وتوحش المطامن بعد تونيسة
وخيم غبها للغافلين طعوم
نخاف في القريب تصير له تنكيسه
يبقى الغدر شايع والوفا امعدوم
هموم في صدور العارفين حبيسة
واخذات عقلي بينهن مقسوم
لفن للعقول أشغال وتموليسة
لهن زمان لا منثور لا منظوم
فطام قبل وقته سّمرك تحويسة
وسال من مجرب حوسة المفطوم
ايغيثك اللي في المهد نطّق عيسى
ونجا رسوله من أخباث القوم
ف الغار حافظه نين ارتحل في قيسه
وبوجهل عاود منخزي امهزوم
وبات عايشه هو صاحبه وجليسه
صديق بات صديقه رضي امعلوم
بذل في سبيل الله كل نفيسة
بعيد ع الذميمة ذامّه مذموم
مع جيل ع التقوى نشا تأسيسه
نجوم ما بعدهم في الزمان نجوم
اخيار قرنهم صفوة ابطال تريسة
اخزام كل متكبر كفور غشوم
ولا المسك لاصلي تلحقه تطميسة
ان فحفح وما شمه اللي مزكوم
خليك م الروافض هل أفكار نحيسة
واخذين من حقد اليهود اختوم
دليلهم تحطّم من اجرار رفيسة
واللي مالها كرعين بيش تقوم
يعلي اعلاماتك بعد تنكيسة
اللي ما يكيدن قدرته لغموم


منقول للشاعر الشريف الشارف الحرنة

هدي روعك
ولا تحزن م اللّي خربوا مشروعك
كيف الغريب بقيت بين ربوعك
ما تقول عندك في البلاد ادموم
لا تخاف ما يمشن بلاش دموعك
على الله يبقوا من دعاك ظلوم



منور مشاركة قوية

تقبل مروري