درتو عزم واحملتو بلاي

درتو عزم واحملتو بلاي
ونا مالقيت بياع العزوم
انسيتو قول ماغيرك غلاي
عطيتو عهد غاليكم اندوم
مانحساب يعجبكم ابكاي
وما نحساب تسقوني اسموم
رخيتو ليش يافرحي اوزهاي؟
غبتو ليش؟ غيبتو النوم
كنتو بدر قايد في سماي
شعاعه شاع طفاهن انجوم
بنيت امال هديتو ابناي
في الانقاض ارتدمن اليوم
اطيور الصوب حتمنا عزاي
نون رحلان وانسني البوم
ازهور اجنان ساقيهن ابماي
هجمهن ياس ياشينك اهجوم
لحضة فرح ماطالت امعاي
قطعها الياس عقبلي اهموم
غيبة ناس كانو هم ذراي
اوكانو كيف هبات النسوم
منها غاب في لحضة اوعاي
اغرقت افيم مانعرف انعوم
طوف نجاه مالقيته احذاي
اوطير عقاب فوق راسي ايحوم
لا ماهناك من يسمع نداي
اونا مابيت للواقع انروم