ولد البادية وولد المدينة

ahlawy الجمعة أغسطس 06, 2010 2:25 am

مساجلة شعرية شعبية بين ولد البادية وولد المدينة
مانك متاع زرادي
من شكـلك إنت سحنون نوعك هادي°°° بلا مواخـدة مانك مـتاع زرادي
مَانـــــك مـــتـاع جفــــــارة °°° ومَـانــك اللـي أهـلـك تـريــس عـصـارة
حتى عيشـتك عايش حيـاة حـضارة °°° بَحْـدَى ليلى كل يوم تـبـدأ غادي
ولا تعـرف الحـضـرة من الـزكارة °°° كــله ســـواء عنـدك تـراث بـلادي
إنْضـنك إلا تسمع لناس نصارى°°° اللي يترادحــوا مع بعض بالتعــدادي
وتشطح معاهم وعندك الرقص مهارة°°°ولا تعرف حشْم عندك كله عادي
وفي طلعتــك لازم من النظـــارة °°° ولِبســك مرقّـع تقــول لِبس تشــادي
وفطورك من البريوش تاخد حارة °°°حسابك إنت والبنت اللي في النادي
وغداكم مسلّـفـر بِخُضرته وخياره °°° وتقولوا على البازين حِي مِرمادي
فلوس بوك كاسبها كما القمارة°°° وقرش الحرام ما ينفعش حتى زرادي
كـل شَـيّـكُم أعْــوج عليك خســارة °°° مــا تفــرقوا ما بيـن هادي وهادي
وتّـسمّـوا في مهند وأخته سارة °°° ما تسمّـوش لا مطيـرة ولا البغدادي
ولا تعــرفوا التــنور لا وقيـدة ناره °°° والخبز يوصلكم فــرادي فــرادي
ولاعندكم غيرة ولاحــزارة °°° تشوفـوا العـوج وتفـوتـوه تقـولوا عادي
مانك متاع زرادي
من شكلك إنت سحنون نوعك هادي °°° بـلا مواخـدة مانك متاع زرادي
************************************
مـــــــــــانــــــي متــــــــــــــــاع زرادي *** عايش حيــاة البــذخ جـــوّي هــــادي
بلا منابشة ماني متاع جفارة *** ولاني من اللي يردحوا بِنْدارة
إنكان شفتهم تحلف إتقول سكارة *** وإنكان هادي زردتكم خطونا غادي
وإنكانك على ناسي تريس عصارة *** أن صار الشلش فيسع إيجوا جرادي
ويفزع الشـايب قبل كل صغارة *** ويجـــــبــر العظــــم ويكـــسر قنــادي
وانسموا في سليمة وسالمة ونوارة *** وسميرة وكريمة من أيام أجدادي
وندهن {بدوف} ونلبس النظارة ***خصوصاً إنْجي قِبلي قوي صرهادي
ولِبس المدينة لِبس فيه حضارة *** ونعرف الكاط ونعرف الجِدّادي
ومنين قايل البريوش درت إفطارة***شني المشكلة لو كان فيه زبادي
ونعرف حليب النسلة وأم أحوارة *** وخبزة الجمر انديرها سقادي
وعندي على البازين رفس مهارة***خصوصاً إنجونا ناس من الّبوادي
ورزقي حلال وجايبة بشطارة *** تساخير من ربي الكريم الهادي
وكانك على الغيرة عرب حزارة *** لا إندير عيب ولا بعيبة بادي
ولا إنزمزكوا ولانا من النقارة *** واثقين في ربايت بنات بلادي
وآخـــر كـــلامــــي دوّر الفِـــسّـــارة *** إنكــان ما فهــمته مــــقصـــــدي وإردادي