حمدان يا حمدان أمك توصيك

وين أنت يا حمدان أمك تناديك
وراك ما تسمع شكايا وندايا
يا مسندي قلبي على الدوم يطريك
ما غبت عن عيني وطيفك سمايا
هذي ثلاث سنين والعين تبكيك
ما شفت زولك زاير يا ضنايا
تذكر حياتي يوم اشيلك وأداريك
وألعبك دايم و تمشي ورايا
ترقد على صوتي وحضني يدفيك
ما غيرك أحد ساكن في حشايا
واذا مرضت أسهر بقربك وأداريك
ما ذوق طعم النوم صبح ومسايا
يا يما عطيتك من حناني وبعطيك
تكبر وتكبر بالأمل يا منايا
لكن خسارة بعتني اليوم وشفيك
واخلصت للزوجة وأنا لي شقايا
أنا أدري انها قاسية ما تخليك
قالت عجوزك ما ابيها معايا
خليتني وسط المصحة وأنا ارجيك
هذا جزا المعروف وهذا جزايا
يا ليتني خدامة بين أياديك
من شان اشوفك كل يوم برضايا
مشكور يا ولدي و تشكر مساعيك
وادعي لك دايم بالهدايا
حمدان يا حمدان أمك توصيك
اخاف ما تلحق تشوف الوصايا
اوصيت دكتور المصحة بيعطيك
رسالتي وحروفها من بكايا
وان مت لا تبخل على بدعاويك
واطلب لي الغفران وهذا رجايا
وامطر تراب القبر بدموع عينيك
ما عاد ينفعك الندم والنعايا