هناك ناس تكرههم من أول ليله وهناك ناس مايهونوا سنين طويله

EZMERALDA السبت فبراير 21, 2009 12:44 pm

هنـــــــــــــــاك نـــــــاس حبايب وهناك ناس تكرههم من غير سبايب

ولاعقل عامر كيف عقل الخايب
ولا وجوه تندي كي وجوه بخيـــــــله

هنــــــــاك نـــاس يامحـــلاهــم وهناك ناس ماتقدر تعيش بلاهــــــم

وهناك ناس حسديه وسود انياهم ثياب بيض من بره ومن جوه نيلــــــه

هنــــــــــاك نــــــــاس غــــــــوالـــي
حتى ان باعدوا ماكيفهم لا والـــــي

حمالين للســـــيه بطـــوعة بـــالـــي
على خطهم ما عندهم تحــويــلــه

وهناك ناس عشرتهم خطا طوالـي
مكتوب في جباهييهم خراب العيله

وهناك ناس تعزم واليدين خوالي
وهناك ناس تبخل والجيوب ثقيله

هدايات م الرب الكريم العالـــي
وبو طبع ما تنفع معاه الحيلـــــــــــه

هناك ناس مـــا تـــقــبلــــــهم
وهناك ناس لك غاية تجول لهلهم

وهناك ناس لاداروا خطا تحملهم
وهناك ناس في عقلك لهــم تجفيله

وهناك ناس ع الحيين لا تجملهم
اللي تجيك منهم مالها تبديــــلــه

ولايفرقـــوا ظنــي الا بعملــــهــم
ما حد ع التسعه مــــــــــزود ليـــله

وهناك ناس ما ينسوا اللي صارلهـم
يردوه بعبـــــــــــــاره ووافي كيـــله
وهناك ناس لاهب الهبوب خبلهم
ونسيوا اللي عدى وضاع جميلــــه

ولاخير في اللي ما يبات عللــهم
ولا في الخليل ان كان فات خليله

هنـــاك نـــاس يــا مبهـــــــــــــاهم
وهناك ناس توعدهم وما تلقـاهم

وان قابلتهم تلقى العذار معـــاهــم
مجهزينـــــه ماعنـــــد هــــم تعطيـــله

كلامهم اللي قالوه ضـــد انياهــم
ان كان بحروا ينووا ع التقبيلــــــــه

احتـــار فـي مــودتهــــم اللي ماشاهم
مربيينه شاطب وحار دليلـــــــــــــــــه

لصحاب كيف في صف العدو تلقاهم
صحبتهم معاك مغير نصب وحيله

قريب نقصهم منك بعيد وفاهـــــم
مشيول ع الدبر في حملهم تمييله

مفتوح علخساره بيعهم وشراهم
الستره مع بو صاحبين قليـــــــله

هنـــــــــــاك نــــــــاس أمـــــاره
وهناك ناس ماظني سياوو باره

وهناك ناس تلقى سعيهم في الكاره
وارزاق واجده غير النفوس بخيله

والمال في قلبل العزم راه خساره
حتى وهو حكيم بعلم في تعديله

وهناك الفقير وما يسيب عــــاره
حتى ان كان ماعنده اليد طويله

وان ماكان في جيبه قضى من جاره
علي قيس نيته ربنا يعـطيلــــه

موكار الصقوره ماتجيه حبارى
ولا مرومه تلحق ثمن لا صيله

وحظك اللي ترميه م البذاره
يطلع بعينه تحصده وتشيلــــــه

والجدي لو تقوى نين فات حكاره
ان يبقي على شيل الحمول هزيله

وشوف الجمل حتى ان خف عباره
صليبه علي حمله ترميــــــــــــــله

شديد العصب حمال في مشواره
قطاع الفيافي وين مد رحيــــله

ان راد ربنا ماحد يسيب كاره
الراس راي والواطي ان زال وذيله

هنـــــــــــاك نــــــاس يا مبسلهم
لاغريب يقبلهم ولا مــــن هلـــــــهم

وهناك ناس في الحيين شين عملهم
ذكر نخيل لا رميه ولا تظليـــــــــله

علقــم وحنظــــــل وين ما تاكلهـــــم
وان رافقتهم يبقوا عليك عــــــــديلــه

وان نازلتهم بالدار جار لهلـــــــــــهـــم
علي عيب عيل يجردوا بالعيله

علي جارهم ديما يزيد عللهم
قلال العنا لاجت الدلو تقيله

Nicolas Cage السبت فبراير 21, 2009 12:50 pm

تجنن غير عاديه شكر على المشاركة الحلوة

الاطيوش السبت فبراير 21, 2009 4:39 pm

من روائع وقد أجزم بأنها أروع ماقيل من قصائد الشعر الشعبي عن الناس وأصنافهم
عُمرهذه القصيدة 75سنة تقريباً
اهناك ناس تكرههم من اوّل ليله

للشاعر المرحوم: سعيد يونس شلبي

قصيدة شعبية نظمها الشاعر في سنة 1933ف وساجله فيها عدد كبير من الشعراء

مشكورة على ذوقك