اكله سمحه جربووووها ..

المقادير

6 حبات بطاطا او 7 او حتي 9 ممكن يمشي الحال .

2 باذنجان

2 فلفل حلو

6 فلفل حار

3 حبات طماطم

1 بصلة كبيرة

4 تومة

جبنة من أي نوع

شوية زيتون شرائح

الطريقة

تقطع البطاطا الي شرائح عادية و تقلي في الزيت ,, و زيها البذنجال و الفلفل .

تفرم الطماطمات مع البصلة مع شوية التومة مع بعض في الخلاط لين يقعد سائل واحد

ناخدو هالخليط هذا و نحطوه في طنجرة صغيرة و نزيدوه شوية زيت و شوية ملح و شوية فلفل اسود و شوية كسبر وكروية ,, اه و اهم حاجة

نص كاشيك " ملعقة " طماطم معجون ...و نحطوه عالنار و نراجوه لين يغلي ,, بعدها انقصوا عليه النار ونخلوها هادية .. لمدة متلا عشرة دقايق.

في هالاتناء نلهو بالقلي حني مرة مرة ,,, بعدين ناخدو صونية كبيرة نحطو فسطها الزيتون اللي علي هيئة شرائح و نحطو أي جبنة متلا حمراء

مبشورة او شرائح او حتي مافيش عادي ,, و نجيبو الحاجات اللي قليناها كلها و نحطوها و نجيبو الصالسة اللي طيبناها و نصبوها فوقهم ,, و

نخلطوهم كويس مع بعض لين يتوزع الخليط مزبوط.

ناخدو طاجين بايركس ,, اه قبله نفتحوا الكوشة و نولعوها بش تسخن ,, و ناخدو الطاجين و نمسحوه كويس لانه لو فيه امية ممكن يطربق في

الكوشة ,, مش ممكن ,, هذه اكيدة ,, المهم و نحطو فيه هالخلطبيتة هذه كلها ,,, و نساوووها كويس ,, و ناخدو ,, دحيتين " بيضتين " او "

بيضتان " ,, و نخلطوهم مع بعض البرا و بعدين انصبوهم في الطاجين و نوزعوهم عالسطح كويس ,, و نحاولو نخللوهم شوية فسط الخلطة و

خصوصا من الجوانب ,, بش تشد في بعضها ,, و تنحط في الكوشة ,, لمدة ممكن ربع ساعه ,, و بعدين نحمروها شوية من فوق ممكن مدة خمسة

دقايق ,,و بعدها نطلعوها من الكوشة

طبعا لو ان الطاجين بايركس ,, فلازم انه ينحط علي سطح جاف ,,, و الافضل علي فوطة جافة ,, لانه زي ما قلت يطربق من المية .


ان شاء الله تعجبكم ,,, و ان شاء الله متعرفوهاش من قبل و نكون جبت حاجة جديدة .