بطانية و سرعة و اجتياز و دنيا حايسة ...

السلام عليكم و رحمة الله و بركاته

ان شاء الله بخير و صحة و عافية و تشربوا في سحلب و تاكلوا في كاكاوية محروقة !

يا حبايبي هذاك اليوم راكب في سيارتي و مروح من الجامعه طلعت من البوابه الخلفيه .. خذيت يميني و ماشي شور الجزيره جت سياره جنبي نيسان ألتيما آخر موديل بحت فيا من طراطيف عيونه و رافع حاشية خشمه فوق هكي و نغز السياره و عدا يووونّ ..لنقانه رقالي .. كيف الموضوع هذا ؟؟؟ و بحكم أني ما نحبش حد يبوز عليا .. قلت بيني و بين نفسي >> و كني أنا .. أمي غسالة؟؟؟؟؟ رديتلها المارشات يا بويا و لحقته .. مع أن فيه فرق في نوع السيارات ..لكن كلنا ياباني و ماحد خير من حد ..طقينا في الجزيرة هو قدامي و أنا وراه و بحكم أن الطريق زاحمه شوي هنا يبان السواق مزبوط ..طلعت أجتـزته من عـ اليمين و طبعا هو خايف على سيارته النزيكه ..و خيكم تقول لاقيها في شكارة تشبس ...المهم طلعت من على يمينه و نغزتها و رد مارشات على قوو ما يقوى وعطيتها .. طبعا الأخ حتى هو شغللها المهم أنا إجتياز من اليمين و من اليسار و ضاغط على الشراتوري و الدنيا حايسة ..كورفه من الكورفات جاء يبي يجتاز من اليمين و انا ما نبيش نخليه يطلع لأنه لو طلع معناها بالرسمي .. ماعاش نطقه بكل ..توكلت على الله و نبي نسكر عليه من عاليمين أنا خذيت يميني و هو لمسني من الباراكولبي الخلفي السياره فقدت توازنها قعدت تبرم .. خبطت في الماده و أنا راسي يبرم و مانحق في شي .. لما خبطت في الماده السياره طلعت بره الطريق و انقلبت علي جنبها و طبعا أنا في الوقت هذا طحت من على فراشي و نظت و الحمد لله لقيت روحي نحلم و الطيحه جتني من فوق فراشي بس ..لا ألتيما و لا غيرها .. لقيت روحي معفس الفوطه و البطانيه في جيهه و أنا في جيهه أخرى و عافس على النقال جنبي
و أجعنـّـــه ماهو حالكم


و هذا حادث من حوادثي مع بطانيتي

و إلى حادث آخر

نقوللكم ردو بالكم تجروا على طريق البط و الا الوز او اي سريع آخر ...

اولا الحمد لله على السلامه
ثانيا ممكن الحلم يكون حقيقه
فهمت قصدي ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انقولك يسيدي يعني ابتع التيما موجود فعلا