نار عزيز أيش أيطفيها ** منها فيها ** تكبر وين الليل إيجيها ,, للشاعر الشعبي ونيس الخمسي

نار عزيز أيش يطفيها ** منها فيها ** تكبر وين الليل يجيها
****************************************
نار عزيز أمنين أتشب ** أتزيد لهــب ** تخرم ونرد وتقلب
بعد شاطت من غير سبب ** أنظر عاليها ** كيف النص وكي واطيها
نار وماهي نار حطب ** من يكميها ** يقفز ويجض ويرخيها
***************************************
نار عزيز اللي ما الموح ** وكثر أجروح ** وفاهق للناضر مفضوح
أنوح معا عيني وتنوح ** علي غاليها ** من كاين قبل أمزهيها
عندك ياعيني مسموح ** أتهاتي بيها ** نارك نار أيش يطفيها
*****************************************
نار عزيز ونار الشوق ** أبهن محروق ** بحالي ما يعلم مخلوق
أبعد مولى السالف مفروق ** وعين شبيها ** عين الريم هميل الجيهه
جا حكم القاضي منطوق ** جور عليها ** حتـــى والعقل أمحاميها
باب أستئنافه مغلوق ** اللي يداويها ** نين عزيز يروف يجيها
***************************************
نار عزيز عزيز وناره ** موح أدياره ** لا بنباه ولا بأخباره
جرح العين قوي سطاره ** لو ترعيها ** تدلف بالدمع أمواقيها
رق أعزوم وحال صغاره ** يا مواسيها ** روف بحالته خليها
******************************************
نار عزيز أللي حرقتني *** حرقاً شين وفيه فضاعه
لا يبرا لا هي أقتلتني *** ظني نين قيام الساعه
ننقانها شينة أجبرتني *** للأوهام نجي نداعه
ريت النار أللي خلتني *** نشلى حتى في ألأذاعه
جملة بنغازي أسمعتني *** يا العزيز أنريد شفاعه
كان أحذاك عرب لآمتني *** قوللهم ناره ولاعه
نطري من نيران رزتني *** مضايق عقلي بأوجاعه
منها في لأنعاش رمتني *** والدكتور بلا سماعه
كاتب لو اللجنة دزتني *** للخارج ماهي نفاعه
ولا دويان عرب داوتني *** ولا تكواي علي القباعه
ما الياسات أللي لا جتني *** حيه علي الغفلة فجاعه
نقفز منها كي صابتني *** وتهتك ع القلب أضلاعه
كانا في ديموم خذتني *** لا بمرساه ولا بأشراعه
أنظر لأيام اللي أعزقتني *** عزقة زر علي بياعه
صايف والدنيا أقهرتني *** ذابل كيف اللي ف مجاعه
ع التظنين أنها خانتني *** خونة خاين هك أطباعه
ونا كثر أسباب كادتني *** لهن ما عندي غير الطاعه
ما نرفض كنهي شالتني *** شور أوهام عزيز وقاعه
كان العين عليه نهتني *** قلتلها ما فيه شجاعه
حاجة منها ما فكتني *** يا غيبة هلي فزاعه
شينة لهلابا ضرتني *** نار سفيها *** ما تبرد من قولة حيها
والعبرة كنهي أخنقتني *** لو أنواريها *** يحدر دمع العين كريها
وهذي نار عزيز أيــــــــــــــــــــــــــــــــــــــــش يطفيها ؟ ؟ ؟ يا (( أمير برقى )) ويا (( أهلاوي ))
ويا كل من يعرف الأجابة (( الرد )) .
أهداء لكل محبي الشعر الشعبي ,,, ولإعضاء منتدانا الرائع مع أحترمنا وتقديرنا للمدير الرائع
وكل ألأعضاء المحترمين ,

[u][b]