أخسارة لو مانك مرهون ** فيك أعيون ** وخد ولون ** رزني جيت أبهن مكيون من روائع الشاعر الشعبي ونيس الخمسي ***

أخسارة لو مانك مرهون ** فيك أعيون ** وخد ولون ** رزني جيت أبهن مكيون
********************************************
أخسارة لو مانك منحاز ** أتقول قزاز ** أخدودك زينــــهن غـــــــماز
جمالك حاجة ما يعتاز ** بلا مسحون ** أتحوزه كاس جمال الكــــون
جمالك مالنوع الممتاز ** الله يصون ** مثيلــــك مسع ريت حــــــنون
أعيون الطايب ع المركاز ** خبر مزيون ** أن جلوله صيده مضمون
******************************************
أخسارة لو مانك يا ريد ** علي بعيد ** أبقيت بعد غـــــــنواك جـــــــديد
رسم ياسك ع العين أكيد ** علي ما تهون ** العيبة في صاحب واشون
تربينا يا شوف الجيد ** علم مصيون ** الصوب اللي يخونه ملــــــعون
خبر واجد سو وتنكيد ** غلا مركون ** أصعب وأستاعر كيف يكـــــون
*******************************************
أخسارة نا نحسابك فاضي ** وأنت راضي ** بالغير وما ليك غراضي
يا نقاض جميع أمراضي ** في المكنون ** صعيبة في عمان وبــون
وما تجيبك فتوى لا قاضي ** ولا قـانون ** أبنوده فيهن قابل عـــون
*****************************************
أخسارة لو مانك من نوع ** صعيب قنوع ** براياته داير مشـــــــروع
رجايه فيك أبقي مقطوع ** بعض أسنون ** الياس معا العازه وأديـون
اللي واتالك شالك طوع ** بغير أضنون ** علي ماضي تمه مدفـــــون
****************************************
لو مانك مرهون أنجيبك ** شين سريبك ** ما نقدر حتى ندويـــــبك
يا راضي وأحذاك نصيبك ** يامـــا دون ** أرضاك ودونك ياما دون
نقفز ما لنوم أنهاتيبك ** جن أجنون ** اللي واطي جمر الكانــــون
*****************************************
أخسارة جا دونك حايـــــــــــش *** بعيد أجنابا ما تنطــــــــــــال
صعيب وعمره ما ينخــــــــــش *** أمظلم فيه أهوال أهـــــــوال
ويا ما فيه من الهايــــــــــــــش *** اللي ما رينا له مثــــــــــــال
وفيه مطارح فيهن غــــــــــــش *** وخيذة بين أسيوف أرمـــال
مطارح فيهن غير أتـــــــــــــوش *** لفاعي سود وسود أصـلال
وفيه اللي ذانا عــــــــــــــــــرش *** وفيه أضباع وفيه أغــوال
وفيه أذيابا منهن كـــــــــــــــــش *** السامع والناظر يا بـــــال
وفيه أسباع وفيه أعشـــــــــــش *** أطيوره فيهن شين أشكال
وفيه أجنون كفر وتنــــــــــــــش *** قديمة دارت فيه أعيـــــال
خلا خالي شين وموحــــــــــــش *** أسود مافيه وسود أجـبال
ما من كوت بسيده خـــــــــــــش *** توارى ويش اللي مـازال
ناس يقولو مات عطــــــــــــــش *** وناس خبرها ما ينقـــــال
وخيذه بين أنياب أنهـــــــــــــش *** طراطيش ودمه شتــــوال
أدرجح عدا غير يحــــــــــــــش *** علي روحه لو كان تســال
هكي يالغني نفــــــــــــــــــــرش *** غلاك أبقي عندي محــــال
أنعدك كي سيد الجايــــــــــــش *** اللي دزوله يوم أقتــــــــــال
هني سيده من قبل يقـــــــــش *** الغزي حلاله كله شــــــــــال
إخلي نجعه كان أمفــــــــــرش *** أكحيـــلة والمرتـــــــاع دلال
وكم من ذود عليه ينــــــــــش *** رعاوية مكسوب حـــــــــلال
أمعاهن بو دملج ناقـــــــــــش *** نفايل لباس الخلخـــــــــــــال
اللي بأهذوبه وين رمــــــــش *** افرح سيد الغزي بما طـــــال
تباعد بيهن ويكــــــــــــــوش *** يريد أوطانه في المقبـــــــــال
هرب منهم خبار فقــــــــــش *** حسوفة يا فقدان المـــــــــــال
أوصل هضاك السيد شلـــش *** الفزعة يا سيد العقـــــــــــــال
علي عيت الغزي أمــحـــرش *** وخيـــذة يا ريم الجفــــــــــال
لفاله ضيق وشين غـــشــش *** أبقي في حالة شــــينك حــــال
شد أصروع أزرق شايــــش *** يقول العيــــشة غير أهبــــــال
وراهم لا يكبى لا أدهـــــش *** وراهــــم ع الجرة مــــــــــازال
أوصل فيهم في ليل غـبـش *** هنايا بين أغرود أرمـــــــــــــال
نظر رايسهم يــــــــدودش *** يقسم ويــــــوازي جـــــــــــــــوال
عدل بندقته وين لطـــــش *** أغــــــــرق في دمه ما ينشــــــال
أركب فيهم بالعرم يقــــش *** مطــــــاويح أيمـــينه وأشمــــــال
ألعب فيهم كي قولة كــش *** ومات اللي منـــــــــهم ينطــــــال
قتل منهم واجد ريـــــــش *** أمغــــــــــير اللي نــــــــاجي ذلال
وعاود بالميخوذ دبـــــش *** أمعــــــــــاود بالمسلوب أرتـــــال
تحرر بو خدين أمـــــرش *** وشوف أتقـــــــــول عناق غـزال
أقرب من نجعه مستـاحش *** وزغـــــــــرتله لواي الشـــــــال
أوصل في بيته قبل يخـش *** برم قاللـــــــــهم كني قـــــــــــال
طاح علي ركبيه ربــــــش *** يقول أجرحـــــــــت ونا حمــــال
مسك جنبه بيده فتــــــــش *** دفق دمـــــــــه حادر سيــــــــال
شالت بالعيطة تــــــــدوش *** من أمه وين عليــــــــها مـــــال
أشهد في أيديها ورعـــش *** رحل عنـــــــــها سيد أم أنعـــال
عزانا فـــــيه عـزا دروش *** العــــــاقل زاده غير ضــــــــلال
عزانا فيك عزا قــــشوش *** لنارك يالغــني عــــــــــــــــــوال
حسوفة في الخاطر تنــبش *** أجروح دواها ما ينطــــــــــــــال
وداعاً قلنالك معلــــــــــش *** غلاك أيهون ** جنين أولد ميت قزون
***********************************************
هذه القصيدة للشاعر الشعبي ونيس الخمسي وقيلت في سنة 2002 ف تقريباً وهي تعبير من الشاعر عندما تفاجأ بأن من وقع في غرامها مرتبطة رسمياً بشخص آخر ( وهذا معنى كلمة مرهون أو غني في اللفظ الشعبي ) فكانت هذه القصيدة عبارة عن وداع من الشاعر لتلك التي عشقها التي لم ولن تكون له ,,, متحملاً الألم ووجع القلب ,,, وربي يكون في عون الجميع .
ملاحظة / أذا وجدت أي عبارات أو كلمات غير مفهومة أرجو كتابتها لتوضيحها .
مع تحياتي للجميع أخوتي وأخواتي وأصدقائي وأحبائي أعضاء منتدى ( سلومى ) الرائع عموماً اليوم فقط تحصلت على كلمة السر الجديدة للدخول بعد محاولات دامت أسبوعين تقريباً للدخول ,,, والعتب ع الذاكرة .
شكراً للجميع وأقبلو مني فائق التقدير وألأحترام أخوكم الحجاج .

أخسارة لو مانك من نوع ** صعيب قنوع ** براياته داير مشـــــــروع
رجايه فيك أبقي مقطوع ** بعض أسنون ** الياس معا العازه وأديـون
اللي واتالك شالك طوع ** بغير أضنون ** علي ماضي تمه مدفـــــون
دزلى الباس ورد عالخاص بيش بعد تنساه نذكرك بيه (ههههههههه)او حطه فى اعلانات المنتدىياوخي معش تنساه بالله عليك راه غيابك ضرنا استوحشناها قصايدك بصدق
منور وصحيت عالكلام القوي والله يكون فى عون شاعرنا وعون اللى ذاق هالموضوع